余香凝、廖子妤：時裝是一種表達個性的東西〡Unexpected Sisterhood

姐妹淘最喜歡分享扮靚，時裝懂多少，不是最重要，重要的是兩家嬉鬧取笑一番，又互相提醒鼓勵，世界之大，知道你一定撐住我。

余香凝和廖子妤的姐妹情，載譽歸來，由大銀幕演到小銀幕甚至紙本雜誌也有一陣𡃴，講時裝講生活，沒有冷場。

Jennifer：時裝對我來講，反映心情，當日如果想男仔啲，穿得型少少，想女仔啲……

Fish：來M會穿什麼？

Jennifer：會hea啲，盡量唔去街，咁就唔使理穿什麼。

Fish：時裝是一種表達個性的東西，「人靠衣裝」。我喜歡舊時代服飾，感覺好正式，穿起來腰骨都挺直，好似我公公，一出街就蠟頭西裝西褲（Jennifer：連對襪都襯得好靚。）那是我爺爺，佢都好fashion。電影的話，我鍾意《The Great Gatsby》，又鬈髮又珠珠首飾，服裝又正式，食支煙都要加支長濾嘴。家陣，衣飾太多選擇，好難handle，我出街好求其咋！

Jennifer：你時尚喎！公司成日最擔心我穿錯衫，你骨架子好好，求其穿都好睇。

Fish：同事幫我襯好，我襯的話，一場災難。你穿禮服露少少「罅」，少少性感，好靚好端莊，穿高腰褲就唔好喇！

Jennifer：你又白，穿什麼都好看。（繼續自說自話）

Fish：你唔好太愛我啦！

Jennifer：唯獨是扮可愛……漁夫帽、返學校服領，你有一個可愛系列，我唔多鍾意。

Fish：呀……！（嬌嗲mode）講番正題，最近發現一個好fashion的例子──繆騫人，穿衣真好看。我早兩年睇完張艾嘉《最愛是誰》才認識繆騫人，佢好有型，樣子唔算好精緻，眉宇間卻透點倔強，我諗：自己是否也可以行這條路線呢？

Jennifer：《Ming’s》講過啦！

Fish：當日我轉發了《Ming’s》篇文，即收到媽咪電話，佢話我個名原本就叫「廖騫妤」，佢都好鍾意繆騫人，只因「騫」字筆劃太多，怕我罰抄辛苦，才改做「子妤」！！！

Jennifer：係「我」唔係「和」！你講廣東話總有微少歪音，笑下啫！其實，你記性超好，又好叻企在別人角度想事情。

Fish：呢個真係我優點。你都似一個學校模範生，立定做一件事，一定做到好，圓滑，少得罪人，別人覺得我鍾意「趷」人，塊面全黑，我唔識控制情緒，向你學緊。有時我收埋自己，你唔會逼我，又唔會唔理我，真的好人，好彩有你咋！

Jennifer：你要改一下遲到問題。我知你唔係有意，亦會預早準備出門，只係無法專注一件事，臨出門口，走去跟貓玩，睇書，「碌」電話，搞到遲到。

Fish：你夠係啦！講唔講好呢！對男朋友好啲啦（細細聲）！你好投入感情，但對於另一半嬲點奇低，你想嗲，想對方緊張，但每日嬲一次，遲早對方唔要你。我頂唔順你個friend似隻貓仔，我唔鍾意男朋友對我太好，你鍾意大隻佬嘛！

Jennifer：你唔鍾意咩？我比較喜歡嘻嘻哈哈，大家似小朋友的相處方式。

Fish：我都鍾意，同時也希望對方能夠教我東西，讓我崇拜。

Jennifer：我唔需要。我們傾過，會否跟對方拍拖，哈哈！我唔要受你脾氣。

Fish：我都唔要。