搵到適合自己的理髮師並唔容易。佬編通常睇外型。一般來說，外型相對入時的理髮師，無咁易中伏。呢點在中佬理髮師身上，尤為明顯。如果個中佬理髮師的外型打扮，會令你想起我和殭屍有個約會裡面的尹天照的話，佬編會勸你轉身離開，不要留戀。但如果那位理髮師的打扮，會令你覺得「阿叔做咩扮𡃁仔」的話，就可以一戰。呢個方法在佬編自覺幾 WORK，通常命中率都過九成。
個晚幫襯的中佬理髮師，就是做咩扮𡃁仔個 TYPE。但佬編沒有想過，會出事的位，竟然不是手勢。
呢間理髮店都幫襯咗成年，不過由於佬編從不預約，所以每次上去都是唔同人剪。這晚上去，全店只有我和那位理髮師。洗完頭後，明明無客也不是放飯，但理髮師卻在 15 分鐘後才出現。一開始佬編沒有察覺什麼，但佢在夾起我的頭髮，大刀闊斧剪了幾嘢之後，卻突然去了 COUNTER 聽了個客既電話，之後就無返過黎。
佬編最後等不下去，披住剪髮袍行過去 COUNTER，見到佢在用電話，於是問：「咦你得未呀?」佢似乎估唔到我會行過去，馬上過來幫我繼續剪。
忍不住問佢，「係咪阻住你食飯呀？」，「喔唔係呀，咁啱個客打黎做 BOOKING，幫佢搞緊～」。
佬編當然 GET 到佢既意思。這位打扮 OK、疑似舖頭老闆的理髮師，應該是不滿佬編咁耐以黎都唔做預約吧?預約指定理髮師的話，可以賺多一點。佬編於是明知故問，「噢你哋係咪唔做 WALK IN 街客架 ? 」「喔梗係做啦，最緊要黎 ~ 」那位理髮師亦不是蠢材，知道已經玩過龍，得罪咗個半熟客，手上的髮剪俐落地舞動起來，非常爽手。
剪緊既時候，佬編內心反省了一下。係既，自己係孤寒既，但自問都唔算西客呀，洗頭髮個陣又唔駛人落護髮素、又淨係洗一次就得，剪個陣又唔會逼人吹水，剪完又唔會要人再洗吹擸嘢，亦都從來唔會批評手勢。你打開門做得 WALK IN 客，就應該要好好地 SERVE 人吧?
但都明既，宜家咁既市道，想賺多點無可厚非，餐廳D嘢食份量都開始縮水啦。所以由頭到尾，佬編都沒有發過脾氣，講嘢亦都斯文有禮，反而是對方開始唔好意思了起來。
最後，呢位手勢都真係唔錯既理髮師，好快就剪好我個柒頭。剪完起身，仲同我講咗兩次多謝你。一如既往，剪得佬編好帥好帥。I GUESS I’LL SEE HIM NEXT TIME THEN.
有點好奇，畀著係你既話，你還會再去幫襯嗎?
Comments