專訪王君馨婚紗攝影師：2018歐洲婚攝潮流與揀婚紗攻略！

Photo: Daniel Tam Photography

早前王君馨的婚照發佈，除了那套引起全城熱話的訂製西裝婚紗，另一讓人相當好奇的就是到歐洲婚攝的地點與過程。是次明氏請來為王君馨（Grace）拍攝婚照的專業攝影師Daniel Tam，Facebook坐擁近30萬粉絲的他早已是本地超人氣婚紗攝影師，而是次訪問除了回憶拍攝點滴外，他亦會分享2017-2018年度的婚紗攝影潮流，以及外拍時需注意的地方！

MING’S：當時與王君馨小姐合作時，為何會想到佛羅倫斯與布達佩斯兩個地方？

Daniel：其實當初選拍攝場地時，Grace表示好鍾意長樓梯以及復古有型感覺，布達佩斯建築物宏偉夠high-fashion符合佢要求；而佢老公就係一個好sweet嘅男人，佛羅倫斯無咩特別好feature嘅大景點，比較適合影小品，所以選擇地點都依據雙方性格，拍攝過程相當愉快。

Photo : Daniel Tam Photography

MING’S：拍攝期間或籌備時有遇甚麼困難或趣事嗎？

Daniel：過程最難忘係到達布達佩斯當日行李寄失，等到第二日拍攝日近下午四點幾先收到行李，又無衫又無得化妝整頭真係好麻煩！而且本身預算影日光，因為開始入夜關係愈來愈凍，跌到得返幾度，不過好彩新郎新娘頂得順。攝影途中Grace亦經常做一啲比較man嘅pose，整件事好自然流露。另外當日Grace條裙好靚，好多歐洲小妹妹走去摸佢條裙，同埋不停向Grace表示大個都好想着一套，都幾得意！

Photo：Daniel Tam Photography

MING’S：Grace婚照的拍攝地點是？

Daniel：布達佩斯拍攝地點有漁人堡（Halaszbastya）、馬加什教堂（Matyas Templom），佛羅倫斯就係大教堂廣場、聖母百花大教堂（Cattedrale di Santa Maria del Fiore）、米開朗基羅廣場（Piazzale Michelangelo）。

MING’S：有興趣到歐洲拍攝婚照的女生們，選擇婚紗有甚麼酬需要留意的地方？

Daniel：如果想出trip影婚紗相的話，婚紗選擇非常重要，首先一定要與性格相配合，如果本身好sweet而硬要揀好型嘅婚紗，影出嚟效果會唔夾。出去影時要做當地research，雖然大多都係文藝復興古典嘢，但其實城市與城市之間都好大分別，例如巴黎建築比較莊觀、佛羅倫斯比較小品、布拉格好童話，要依照不同城市街景去揀適合嘅婚紗。又或者選擇地方最好有故事，例如可能曾經係英國讀書返去當地影相等，都會令婚照更有深度，亦更易營造故事感。

MING’S：天氣不似預期應該要有plan b嗎？

Daniel：歐洲天氣好難預料，但通常攝影師都會準備有遮蔭地方，拍攝前先同攝影師溝通就可以。其實有時天氣差未必係壞事，例如幫Grace影相當日天氣好凍，旅遊地點連遊客都已經走晒反而影得仲快，落雨時雨粉與水光亦可製造唔一樣效果，反而令件事更加unique。揀酒店時亦最好揀有城市特色，可以影相嘅酒店，例如威尼斯好多都係幾百年歷史建築改建而成，就會保守啲又safe嘅選擇。

Ming’s：2017年最受歡迎的婚照拍攝場地是？

Daniel：其實冇特地城市特別受歡迎，反而係要了解自己需要，好似Grace要樓梯要fashionable，就搵建築物比較宏偉嘅地點。我自己就多影布拉格，因為較多變化亦容易影，地點好密集，點對點之間距離較短係比較方便。其實潮流一直變，前幾年巴黎好受歡迎，近年多人去布拉格，自然環境亦開始多人揀，例如冰島，其實最主要係同攝影師講自己想要咩感覺，再去一齊揀適合地方。