Wyman Wong：長途旅行「有型手冊」

年輕時我們都只想「成功」，後來有些人開得了竅有些不，只有開了竅的才明白，不但要成功，還要「有型地成功」（核突地成功衰過有型地失敗），成功了還要懂得優雅地處理自己的成功……你從我講到哪兒開始甩咗 follow 唔到？因為何謂「有型」也真是一生的功課。大體地說，香港算比上不足比下有餘，「香港的成功」比起「某個鄰近地方的成功」，贏在有型；「成功了的香港」比起「成功了的另外一個鄰近的地方」，輸了一點點優雅，所以「某個鄰近地方」的人很喜歡來香港，香港人則很喜歡到「另外一個鄰近地方」旅行，都是一種「人望高處（但又不敢太高）」的向上本能。

不講哲學性的「人生旅行」講講物理上的「實體旅行」，「有型」也是最最最重要的，我嚮往長途旅行但又可免則免敬而遠之，因為好難 keep 住「有型」，莫講話「靚」，要 keep 住出門一個月「唔核突」其實都是好艱難的，口輕輕話「唔係啩」的人一定無真係試過連續 30 日無返過屋企，否則他「有型」和「唔核突」的門檻應該相當之低。（你以為這叫「接地氣」？細個我阿嫲話個人暈咗要馬上扶返起，「聞地氣」太耐會死的！）

所以我不止一次在巴黎做完一兩星期嘢，就算休息三日之後在巴黎繼續有嘢做，都情願飛返香港瞓兩晚再回去，不常出外公幹的朋友會好奇為什麼如此「嘥時間嘥機票」，只有每年都被迫儲到鑽石卡mileage 的人，才明白間中「埋周」返自己真屋企瞓個好覺屙篤靚屎，再搵相熟師傅剪次頭髮做 set facial 見見心愛的親人朋友，才是風塵僕僕的人 keep 住「有型」「唔核突」的有效補給！

若果你一定要出門好耐，而「有型」的門檻自問唔太低的話，不如和我這個 passport 印仔多過超市印花的人交換一下 notes 吧！

一. 搵定熨斗

爛 gag 時間：年紀大了，人漸漸開始追求「穩定」，就算天意難料，在能力範圍之內，事前都追求「搵定」，做好 research，搭定天地線，謝絕 surprise ！

根據我的經驗，長途旅行在人生路不熟的地方，有幾樣東西預先搵定好重要。

第一樣叫熨斗，除非你完全唔 care 人哋覺得「嘩，條友件恤衫一箸鹹菜咁㗎」，又或者你本事到全個 travel wardrobe 由外套到恤衫到 T 恤到長褲都買到永不起皺物料的版本，否則都要諗諗如何令自己保持光鮮筆挺。

就算我好彩到有得住大酒店，又深明「出外旅行有啲錢唔慳得嘅」的道理，不介意兩嚿幾水俾人齋熨一件恤衫，要幫襯 Hotel Laundry 還要求顧客的有條理和好記性，心水清到記得件衫邊日著而提早 24 小時趕及人家的 deadline 前攞件衫出去，拿出去了還得坐立不安擔驚受怕明早趕不趕及送回來，回來的時候是不是「對的時候」，太早我怕未起身俾人嘈醒瞓唔返，大遲我驚出門前衝鋒陷陣還要打電話去催，催了還要等他們慢條斯理拿上來可能累到我遲到……

所以即使不是為了慳錢（雖然也真是唔係幾捨得），我平時也不太肯幫襯酒店的洗衣服務。實不相瞞，以前我較常用的方法是，早一晚臨瞓前諗諗聽日著乜，摷定出來，如果有明顯而不可不理的摺痕，便濕條白毛巾把皺了的地方整濕，然後掛着它自然風乾一整夜，翌日早晨醒來時衣服通常便會回復波平如鏡了嘩哈哈哈！

當然也有些布料這樣做之後會有水印或者還是不夠直，所以近年都不敢再偷懶，帶定旅行裝蒸氣熨斗出門，雖然確是佔用了空間增加了重量，但至少從此可以安心不怕揦手唔成勢。

比起更多拎咗去但未必有用的冤枉行李，投資在旅行熨斗上其實十分值得。

二. 搵定髮型屋

不是每個人都好命到可以搵到一個「一個月唔剪髮都無乜事嘅髮型」的，所以好多人就算校到臨上飛機前最「閔」水才去搵佢個 hair stylist，人在旅途灑淚汗血時，有些髮型還是不可以靠 set 吓頭遮遮掩掩或者戴帽解決的，如果你出門的時間是長於三四個禮拜的話。

那麼，你早點做定資料搜集，找找當地有沒有合適師傅和 salon 便相當重要了。

經驗告訴我，等到非剪不可時才亂撞入一間，通常是最「就手」的一間，結局是可以非常「瀨嘢」的，在倫敦和巴黎和洛杉機我都付出了所餘無幾的頭髮而買到了昂貴的教訓。

最後一次在巴黎，以為已經學精了，叫長住當地的朋友推介一家靠得住的，並自覺好醒目的講明「不要介紹我去那些只會講法文的髮型師啦！」結果他替我 book 好了時間，我依時到達第二區 Opéra 附近的 salon 正開始講出要求「I just need to tidy up a little…」便看見那位 stylist 一臉茫然接着緩緩吐出「すみません……」時，我才知道出外有時真的不可以靠朋友只可以靠 Google 的！

（未完，下期續）