林嘉欣：「媽媽」這個角色比較似一個鏡頭 〡四月號

時裝的戲劇 ／ 林嘉欣

張愛玲說「衣服是一種語言，隨身帶着的一種袖珍戲劇。」不同服飾賦予穿者不同的情感、角色、身份和形象，要有能力把時裝穿出故事把袖珍戲劇發揮極致，除了林嘉欣不作他想。穿上一身時尚演繹貪嗔癡，鏡頭前，不消一刻便有聲有畫面有味道了。

生活上，嘉欣肩負的角色眾多：演員、妻子、媽媽、藝術策展人，早前，她更跟隨宣明會去了烏干達探訪難民營，回來後，出書辦簽名會籌款。同一時間， 一人分飾多角， 猶如耍雜技， 生活是一個提煉場，每一個角色也是難得的機會，讓她去感受享受。

你覺得服飾可否幫你入戲 ？

當然可以。不同場合穿戴不同服飾，給人不同感覺，我記得有過一件皮褸，已經殘殘舊舊，當時我要演一個殺人犯 ，終日將手插袋，唔想將雙手展示人前，件褸幾乎已跟我個人合二 為一 ，每次開工見到件褸，感覺便來了。為了令自己跟件褸培養感情 ，開鏡前，我特登問劇組借回家，熟悉一下。我又試過借高踭鞋，平時我好少穿，若果去到拍戲一刻才穿上，那對鞋跟我便沒關聯。早點借回來「相處 」 一 下 ，有助入戲。當我這樣study一個角色的時候，便發掘到這個角色的取向。

生活上的服裝有分類嗎？

有呀！跟先生出外睇戲或食飯，穿得靚啲囉！湊女一定唔著白色 ，玩起上來唔怕整污糟，家長日會穿得最斯文；穿上唔同服飾 ， 自己就知道飾演什麼角色有什麼表現。演過這麼多角色 ，演戲的方法有何改變？以前會迫自己進入某一種狀態，依家不再夾硬來。假設遇上一場戲要講死人 ，但當日我偏偏遇着一堆荒謬的事情，既然喊唔出 ，索性跟住感覺走，或會忽然大笑一場來呈現無助 、 荒謬和悲傷。

有沒試過不滿意自己的表現？

經常！跟我共事17、8年的同事，好少見到我發脾氣，我發忟憎都是忟自己。每跟一個新導演合作， 你覺得對方認識你好？還是不認識你好？唔認識「 林嘉欣」更有優勢 ，倒不如 clean start，終日記掛以前，反是拖累， 將我困在一個框裏面，難有突破。早前受邀往烏干達探訪難民營，事前最擔心？

宣明會一問我就應承，誰知愈接近出發，愈瞓不好。我第一次踏足非洲，第一次去難民營，其中一個營距離南蘇丹只半小時車程，突然想起『兩個女仲好細！』。內戰地方 commercial flight 唔飛，最後一程機要坐12座位貨機；開始有點忐忑。我先生也同行，他問『我和你一齊飛，大吉利是點算 ？！』我明，但如果得我一個去，感覺唔同，大家要一齊去 ，一齊體驗。去到翌日，我開始饑饉三十，很想體會多點難民感受，即使暈低，我先生也可以照顧我，人工呼吸都沒問題，他說『平時你不能餓，今次眼見車上放了朱古力曲奇和消化餅，你居然30個鐘頭什麼都沒掂過！』完成時，奬我一罐薯片，但營入面五千幾人正輪候食物，我怎好意思食？

旅程最難忘？

難民營六成是小孩子，唔少甚至看着父母被殺。營入面，一個兒童天地，有個女仔義工教他們繪畫，這班小朋友畫了一幅poster，坦克車、走難、血、冇頭人、學校有人張大口尖叫，我好心痛！八個月前，這義工也是難民，帶着兩個細佬跟父母失散了 ，我攬住她講『你好快可以跟父母團聚 』 … …我是善意的，好想給她一個希望，唔知是否真的可以找到，可能也是一個假象……當地有間學校，小朋友大都是愛滋病或HIV病患，離開時，他們一直跑追住我們架車， 他們眼神告訴我『don’t forget us！』嘩！我搏晒老命跟他們揮手。今次，我跟 Kevin（香港世界宣明會總幹事） 講 ，好想做一本攝影集紀錄見聞，攝影集有機會 reach 到一班年輕人，讓他們重新認識助養兒童；我自己第一次助養小朋友都是廿歲出頭左右。

生活中， 哪一個角色最難到你？

做媽媽。沒人天生識做媽媽，小孩子都是人嘛！他們是一個個體，成長中，有開心有不開心，正因他們不停地變，我都要變 ，女兒身上，能夠看見自己最好的一面，也見到最唔好的一面， 真的好難做！

「 媽媽 」 一角似導演？

比較似一個鏡頭，我終日觀察着他們，透過雙眼，紀錄他們一切。做導演，要有judgement，但我對女兒沒有judgement，實在是每一個人都不同，我盡量提供一個又一個open answer，讓她們自行發掘答案，這是我跟女兒的溝通方法。

想不想做全職媽咪？

其實，我最唔鍾意multi task，但生女之後，發覺自己愈來愈鍾意工作 。我問過大女：『你想媽咪日日留家陪你嗎 ？』佢話唔想，我好驚訝！原來佢見到我工作時，成個人好起勁，紮紮跳，後生十年咁款！個女覺得媽咪心情好好 ，好似撻着個掣，真的好鍾意表演藝術，希望佢地長大， 也能搵到一樣事情熱衷去做， 媽咪一定支持 。

做演員都支持？

唔好喇！轉移去畫畫、攝影、雕塑、設計都好；演員好難 ， 要好有定力。你不停發掘自己另一面 ，去做藝術策展人，為想擴展演員以外的可能性？

我看畫而已 ，只是剛啱又能夠認識該些藝術家，我從來也沒提過我是演員 ，每次看畫或跟畫家交流，也不會想着curate，機緣巧合才促成每次事情。跳舞、劇場、畫畫、音樂 ，全都是興趣，全都是養份。我是好彩的，找到自己喜歡的事情 ，「4」字頭了，活得好自在；做媽媽之後，整個人更是神速地長大，找到真正的自己。