TVB劇集《降魔的》本周進入結局篇，聽聞飾演石敢當嘅胡鴻鈞人氣高企。筆者唔係扮嘢唔認睇TVB，而係對呢套劇題材真係興趣唔大。但日日睇晒娛樂版嘅我，當然對胡鴻鈞有所認識。雖然唔係聽過佢好多首歌，記憶中都唔算唱得差。講起Hubert，更多人關注嘅當然係他五官輪廓嘅轉變。作為對潮流打扮敏感嘅人，我反而留意到胡先生最近一個月忽然變潮，Vetements、Gucci、甚至Dior Homme連環上身，唔知係換咗stylist定多咗sponsor呢？參加歌唱比賽同剛出道時期嘅他，完全係潮流化石，成日著啲MK味濃嘅「潮特式」時裝。後來隨著瘦面成功，Hubert每次上台唱歌或出席活動都會著套窄搣搣（cutting少少過時）嘅老西。雖然同時尚仲有一大段距離，但起碼叫做順眼，中規中矩。而家忽然變身，著晒潮到裂嘅搶手貨，但氣質仍舊斯文，予人有點格格不入嘅感覺，我反而有啲懷念佢以前正正常常嘅西裝Look。唔知「石敢當」未來到底會走向更潮，定係穩穩陣陣著返「頭文字I」港式窄西裝呢？
近日忽然著晒潮裝（右起Gucci、Vetements、Dior Homme），老老實實，Hubert本身氣質斯文，唔太啱玩誇張款，即使著咗都唔覺好潮。
聽講係愛打籃球嘅Hubert身形修長，愛著長褸，但唔算闊嘅膊頭嘅佢再加埋窄膊長褸，著到頭面顥大，到時就唔抵。
雖然老西無潮味，但起碼正正正常，如果能夠著返闊些少嘅cutting更加好，事關呢種咁窄嘅剪裁大有「荷里活中心」溝「頭文字I」嘅味道。
其實Hubert本身對時裝潮流應該無乜研究，出道早期都係牛記笠記，星味欠奉。
新人時期Budget唔多，無stylist幫手，似乎只有求其買啲「潮特fashion」，如果係2006年都算合格，可惜彼時已經係2012！
Comments