大閘蟹，又稱為「上海毛蟹」，可能是 4,500 種已知蟹類當中最好味的一種。佬編食過的蟹類，十隻手指數晒，當然冇資格講，由美國美食家 MIMI SHERATON 講，公信力應該都夠吧？
最正宗的大閘蟹來自江蘇陽澄湖及太湖，但一直供不應求，所以還有來自其他地方的大閘蟹，以及臨到賣之前拿去陽澄湖浸兩浸的「沖涼蟹」。
作為遠在香港的消費者，永不會知道真假，所以買蟹嚟講，頭一兩次要靠人脈、靠介紹，又或者靠運氣，遇到對的，不用深究，繼續幫襯就是，退步了就轉場，貪便宜是大忌。
大閘蟹食蟹的天然美味，不需任何調味及烹煮技巧。有爐、有煲，就可以蒸。唯一較講功夫，可能只有煮蟹醋的手勢。很多人會加紫蘇葉蒸，中醫角度謂之「驅寒」，但最緊要始終係隻蟹，有時没有紫蘇葉也不用緊張，寒你唔死的。
熱底寒底有没有科學原理，佬編從來没有深究，但作為挑選餐飲的原則，口味配搭上有一定參考價值。不沾酒的，配杯「熱」的薑茶，滿口油香被一股辛辣沖淡，能減少油膩的感覺，也是很好的配搭。黃酒性溫，味甘、辛，原理與薑茶相類，也是很好的配搭。
有次飲得太開心，蟹未食完，紹興花雕已經見底，隨手拿了支艾雷島蘇威，後來才知道也是受歡迎的配搭，濃烈的煙熏與海潮味，與大閘蟹的香氣各自表述，又是另一種風味。
當然世間没有完美，大閘蟹也有缺點， 正如蔡瀾所說，「很容易膩，經常吃，一多便生厭」，所以，大閘蟹任食的 PACKAGE，恕佬編敬而遠之。而且蟹肉嫩滑緊致，沾醋入口鮮甜，唔食就大嘥。
大閘蟹的第二個缺點，是太花時間。自己手殘，拆蟹龜速，別人開第二隻時，我還在慢慢拆蟹腳。所以佬編喜歡觀察別人拆蟹，原意想學嘢，後來發覺有太多流派，睇完未必學到，就算學到，下次隔了一年，有時也忘記了。
今年再食，想請教返拆蟹攻略，TEXT MESSAGE 傳了過去，才想起那邊還是朝早，以往的蟹友大槪還在睡覺。F
Comments