逛Balenciaga，唔覺意聽到店另一邊的小騷動，某顧客越講越大聲，詐嬌漸漸扭 大成發爛渣，音量之高其他人唔想「偷聽」都唔得。
幾乎釀成血案！
哦，原來惡客投訴的是：「點解你哋啲衫唔做貼身啲？」
完全戥彬彬有禮的店員陰公豬：一，先生你知唔知呢期巴黎世家玩乜野idea，你 自己衝入嚟（某個數字）之前，有冇做吓research？通俗大眾化一點講：你等於行入壽司 舖埋怨人哋冇熱嘢食，行家版比喻就是：大佬冇嘢呀你去Stella McCartney搵皮草？二，阿腥你本人睇落亦唔係話特別fit，緊身衫你著勢必唧咗個肚腩仔出嚟， 何苦執着一個過咗氣（不過我估你唔知）的潮流呢？
至於「釀成血案」，不是因為谷爆售貨員，想出手樁佢的其實是我：「你知唔知 阿叔我捱咗幾耐先捱得到鬆身衫興返呀靚仔？倒—我—米？」
（左至右）Maison Martin Margiela SS2009、Balmain SS2013、Vetements FW2016
熱烈Welcome Back ！
80年代你問人「最前衞的時裝潮流是什 麼？」一定有好多人答你是「大墊膊」。
往後20年你問人「最不希望come back 的過氣時裝潮流是什麼？」得票最高的又是 「大墊膊」。當中最恐怖的是，後來最全盤否 定兼趕盡殺絕big shoulder pads的，很多其 實就是當年無pads不歡的同一班人。
更更令人髮指的是，正正又是這班人， 後來就算懶有態度大彈過Martin Margiela企 圖復辟的美式足球膊，幾年後還是若無其事的 降服於Balmain三倍加pads，並穿街過巷要 耀武揚威，到了Vetements再在雙肩僭建假狗 時，也是這羣人最大聲懶叻「唓，阿姐我早就 著過兼興完唔吼……兩次啦」。
買衫的人最無情，也是講得通的。
所以今日著件hoodie著到粵劇大佬倌一樣舞水袖的人，自然也是悉數從Hedi Slimane 的（前）明教中變節過來的，睇返CCTV保證 誰都嘲笑過荷東廣東disco入面那班舊戰友。
（左至右）Givenchy FW2017、Juun.J Fw2012、Balenciaga FW2017
一命二運，與衫風水
人前人後我一直都說Demna Gvasalia是 我的「恩公」，姑勿論我心底裏面其實認為他 是造時勢那一位，還是時勢造出來的那一位。
現兜兜的事實是，沒有他「闊身衫」就回不來了，我等自決胖子今天還得在獨裁的窄搣搣統治下苟且偷生，或者至少都要偷身！
有點似以前TVB台慶之夜送洋樓靚車那個 環節吧？過去十年八年間，第一個拿着鎖匙去 嘗試開門的絕對不是Demna，首先他的祖師 爺MMM早在90年代中後已大力扭過那道門， 大市冇反應。比他早幾年出手的Riccardo Tisci也刻意把T恤的剪裁放大，也是惹來很 多「保守派」的嫌棄要他改返窄（說起來 Givenchy by RT的崛起我覺得也算是冥冥中 為了Vetements和Demna的成功開路）。
在罵治和G家之間其實還有個更淒涼的案 例，叫做「悲慘的Juun J.的一生」，這位大 韓才子其實在一零年後便幾乎季季「枕住」大 量推出巨大版型的tee、恤衫和外套，但他就 是做來做去都無人知咁滯，幾年後才殺出的 程咬金Demna卻是一炮而紅，一插條key入去 大門就「卡嚓」應聲而開，你話呢啲唔係叫 命水叫做咩吖？事實上這兩年令Vetements和 Balenciga賺到盤滿缽滿的那幾道首本名菜， 資深時裝精一眼便看得出，都是來自Margiela 曾經施展過、卻因走得太前而市民未ready受 落的板斧。除了因為過了些日子科技更進步了所以造得更精美之外，idea上Gvasalia和他的團隊幾乎是毫不修改全盤照搬（雖然說MMM生產這些款時Demna也正在裏面上班，也有「他可能有貢獻」的疑點利益），總之時機對了，小眾變大眾，棋仔變大明星，而我也實在見慣與明白這種時來運到的命運荒誕劇，已無任何嘲諷之意。
尤其當我也是oversize潮流回歸的受益人之一。
世界上唯一能與「時來運到」匹敵的東西就是「長命」！又或者可以這樣說，人世間各種不同的比賽去到最後其實都只是在鬥一件事：「鬥長命！」
我又終於捱到興返oversize了，Yeah！
Comments